الجلاء يرفع العلم السوري فوق شوارع دبي
اليوم كانت مبارة الجلاء السوري مع الرياضي اللبناني في نصف نهائي بطولة دبي الدولية لكرة السلة، صرلي عم حضر لهالقاء يومين، اشتريت كنزة عليها علم سوريا وجهزت العلم السوري الكبير اللي معلقو بالبيت ، وخبرت استاذي بالجامعة اني اليوم بدي اطلع بكير مشان المباراة
المباراة كانت الساعة 19 بالتوقيت المحلي، كالعادة أصدقائي نامو الظهر وفاقو متأخرين وتأخرنا عن المبارة 20 دقيقة، موقف النادي الأهلي (مكان المباراة) كان كتير زحمة، ولقينا موقف بطلوع الروح، ولما وصلنا عالبوابة كان الناس برا متل يوم الحشر، والشرطة ما خلونا نفوت لأنو الصالة انترست، رجعنا بخيبتنا عالسيارة وقررنا نتغدا لبين ما تخلص المباراة منرجع عالصالة لنشوف شو صار مع فريقنا
هي المباراة كانت فاصلة، فالرياضي هو حامل اللقب لآخر دورتين، كما انو كان لازم نرد اعتبارنا بعد خسارتنا معو بمباراة الافتتاح؛ المهم انو رجعنا للنادي بعد ساعة ولقينا جمهور سوري طويل عريض قدام الصالة عم يحتفل ويدبك ويزلغط، أول مرة بحياتي بشوف هيك جمهور بدبي، وهيك كثافة لعلمنا، عن جد شي بيرفع الراس، فجأة واحد كان جايب علم ضخم، عن جد ضخم، يعني شغلة 40* 8 م، رفعنا العلم فوق الشارع قدام النادي، وصارت السيارات الرايحة والجاية تمر من تحت جنحو، عرب وأجانب وسوريين، ويمكن لبنانيين كمان، فعلا كان موقف رائع لحتى اجت الشرطة وفرقتنا، وسلخت سياراتنا مخالفات بحجة عرقلة السير، بس ولو ، فدى الوطن الحبيب
